Táýelsiz Qazaqstandy álemge tanytyp, Ánuranyn oınatatyn, Baıraǵyn jelbiretetin sala – sport. Táýelsizdik tusynda barlyq sport túrlerinen federasıalar qurylyp, olımpıada baǵdarlamasyna kirgen sporttyq jekpe-jek túrleri konfederasıaǵa birikken bolatyn. Maqsat – egemen eldiń barlyq aımaǵyn qamtyp, óńirlerdegi sańlaqtarǵa ortalyqtaǵy sportshylarmen teńdeı dárejede múmkindik berý. Osy turǵyda Qazaqstannyń barlyq oblystary, Almaty, Astana qalalary arasynda QR Konfederasıa kýbogy ótkizilip turady.
Almatydaǵy Balýan Sholaq atyndaǵy sport saraıynda 2-3 jeltoqsan kúnderi dzúdo, boks, erkin jáne grek-rım kúresi, taekvondo, qazaq kúresi sport túrlerinen Konfederasıa Kýbogynyń aqtyq básekeleri ótti.
Almatyda Konfederasıa Kýbogy ekinshi ret uıymdastyryldy.
Almaty quramasy taekvondodan aqtyq kezdesýge Almaty oblysynyń sheberlerimen shyqty. Sheshýshi jekpe-jekte 30 upaı aıyrmasymen almatylyq taekvondoshylar basym túsip, Konfederasıa kýbogynyń ıegeri atandy.
– Ótken jyly Ońtústik Qazaqstan oblysynyń sportshylary bizden basym túsken bolatyn, alaıda, osy jyly biz jetip, eńbegimiz aqtaldy. Daıyndyq jaqsy ótti, bapkelerimiz ben ujymdaǵy aýyzbirshiliktiń arqasynda úzdik atandyq. Qýanyshymyzda shek joq, bizge qoldaý kórsetken jankúıerlerimizge alǵysymyzdy bildiremiz, – deıdi Almaty quramasynyń taekvondoshysy Serjan Baýyrjanuly.
Bokstan aıqyn basymdyqpen Ońtústik Qazaqstan oblysynyń sportshylary mańǵystaýlyqtardy jeńip, Konfederasıa kýbogynyń ıegeri atansa, grek-rım jáne erkin kúresten Almaty oblysynyń tolaǵaılary jeńis tuǵyrynan kórindi.
Osy jyly Qazaq kúresi balýandary Konfederasıa kýbogynda alǵash ret jarys jolyna shyqty. Aqtyq básekede Almaty jáne Qaraǵandy oblysynyń quramalary kezdesti. Almatylyqtar jaqsy nátıje kórsetip, qazaq kúresinen Konfederasıa kýbogynyń jeńimpazy atandy.
Aıta keter jáıt, aıtýly dodanyń júlde qory 125 mln. teńgeni qurady. Atalyp ótken sport túrlerinen árbir jeńgen komandaǵa aqshalaı syılyq, sondaı-aq, medal, dıplom jáne kýboktar tabystaldy.
Qazaq kúresi men taekvondoshylardyń Kýboktary Almatyda qaldy.
